انت مكافأتي 2 دفنا عمر
بترت جملتها فور رؤيتها سيف ،كيف لم تلحظ وجوده قبلا ، متسائلة داخلها باندهاش من أين أتى!
فقالت رقية : نسيت أعرفك بأبن عمي، دكتور سيف!
شعرت رغد بخجل شديد وضيق لغفلتها عن وجود هذا الغريب، فلو لاحظته ، لغادرتهم على الفور ، دون التحدث أمامه بتلك الحرية والثرثرة!
فهتفت وهي تتوجه للمغادرة: فرصة سعيدة يا أخينا!
غادرتهم سريعا ..فنظر سيف على أثرها بتعجب :
أخينا؟!!!! هو أنا مش باين أني دكتور ولا أيه؟!!!!
الفصل التاسع.
_________
أنت صحيح هتسافر يا معاذ؟!
معاذ محدثا أخيه عبر الهاتف :
أيوة يا سليم ، فرصة كويسة جدا ، أني أشتغل في مركز طبي كبير في الخارج ، مع مجموعة أطباء كبار
شغلي معاهم هيزيد خبرتي ومهارتي فيما بعد ..
سليم : يعني هتلحق تحضر فرحي أنا وصفا ، ولا هتسيب أخوك لوحده؟
معاذ بحب : ازاي يابشمهندس ، أكيد هحضر ، انت محدد بعد أسبوعين ، وهكون موجود باذن الله .. ربنا يسعدك يا سليم .. ماتتصورش ازاي مرتاح بقرارك ده ، صفا بنت حلال ومحدش هيحافظ عليها غيرك، ومتأكد إن ولادها هيكونوا ولادك وأكتر ..
ثم أكمل بمشاكسة : بس ماكنتش أعرف إنك حاطط عينك عليها من زمان يا لئيم!
سليم وهو يحك مؤخرة رأسه بحرج : واضح إن الحاجة فضحتنا وحكيتلك كل حاجة ياكبير!
قهقه معاذ بسعادة ، وكم ابتهج قلبه عندما قصت له والدته عن شعور سليم تجاه صفا أبنة خالتهم ، وحمد الله أنه لم يستجيب لرغبتها السابقة بزواجه منها، كيف كانت ستمشى الأمور إن علم سليم بهذا .. كان سيتسبب بجرح أخيه دون أن يدري!
سليم : عموما ربنا يوفقك في تجربة سفرك يا معاذ..وترجع منها وأنت أعلى وافضل بشغلك .. ويفرحنا بيك أنت كمان عشان الحاجة بالها يرتاح ..
معاذ : كله بأوانه ، ومحدش عارف الخير فين ، أنا اهم حاجة دلوقتي شغلي وبس .. أتمني أمي تفهم ده عشان ترتاح وتبطل تفكير!
*******************
أم معاذ : وأشمعنى هتسافر دلوقت؟!
معاذ : يا أمي بلاش الافكار اللي بتدور في دماغك ، مافيش سبب معين ، مجرد فرصة ما ظهرتش قصادي غير دلوقت، وأنا قبلتها، وفي خلال شهر هكون مسافر بأذن الله
الأم بحزن : يعني مش كفاية سليم طول الوقت بعيد عني في شغله من موقع للتاني ، بشوفه كام يوم في الشهر
عايز تبعد عني أنت كمان يا معاذ !!
أحتوى جانبي وجهها بكفيه :
يا أمي دي فرصة هخسر كتير لو ضيعتها .. وسليم خلاص هيتجوز ويعيش معاكي هنا ، يعني مش هتكوني لوحدك ، وأنا سنتين أو تلاتة بالكتير وهكون هنا ، بس هبقى أكتسبت خبرة وعلم أكتر في مهنتي اللي بعشقها ..
